Dr. James Dokhuma hi Hrangchina leh Kapkungi fapa naupang ber niin kum 1932 June ni 15-ah Siaksuk khuaah a lo piang a. A lo pian hlim hian thi sa a lo chhuak emaw an ti a, in hnuaia phum mai tum a bellama an han khung dawn a an han elh vel laiin a lo thaw chhuak ta hlauh mai a, nungdamin a lo awm ta a ni. 1960-ah Chhuanthangpuii d/o Biakkunga, Kulikawn nen inneiin fa paruk (6) an nei a, a boral ni thlengin Kulikawnah hian a cheng a ni. Kum 1947-1952 chhung sipaiah a tang a, hemi chhung hian Hindi leh Gurkhali tawng a thiam em avangin Education Instructor in a tang thin. 1961 a MNF din a nih khan Mizo nih ngaisang mi a nih avangin a zawm a, Tlungvel Block-ah Block President ni nghalin 1965 thleng a chelh a. 1966 a MNF in Independence an puan khan 64 Signatories zingah a tel a ni. Ramhnuai lamah chhuakin MP atan leh Deputy Speaker atan thlan a ni a, kum 2 pumhlum ramhnuaia a vah hnuah March 14, 1968 khan Tuivawl dung a Serlui chhuahah sipaiin lambunin hliampui tur a tuma bawihsawm lovin zan hnih leh ni khat lei daiah a mu a, hemi tum a a thi lo hi mi mak tih a tling. Nowgong Special Jail ah leh Gauhati District Jail ah kum thum (3) a tang a hemi lai hian Rinawmin,Khawhar In leh Thla Hleinga Zan a ziak a ni. 1970 ah Aizawlah hruai chhoh niin 1972 June 21 ah lung in atang a chhuah a ni. Politics a rilruah a thih theih loh avangin kum 1975 a PC party din a nih khan Joint Secretary a ni a, kum 1978 ah PC 'B' Secretary a ni leh a. Kum 15 zet political party-ah nihna a neih loh hnuin 1998 atangin ZNP-ah Vice President nihna a chelh a, amaherawhchu a kum lamin a lo delh ve tak avang leh a hriselna a lo tlak hniam ve deuh tak avangin active politics chu a chawlhsan ta a ni. 1976 atangin Chhandamna Sipai Pawl (The Salvation Army) ah lutin Central Corps ah Corps Sergeant Major niin ropuina rama a kal ni thlengin a chelh a ni. Bible Society-ah thahnem a ngai hle thin a, BESY Melody-ah phei chuan Director hmasa ber niin 'BESY' tih hi a phuah nghe nghe a ni.