Ram hmasawnna bulpui: ‘Education’



“One Child, One Teacher, One Pen and One Book Can Change The World” - Malala Yousefzai

Hmanni lawkah India rama zirna lama mi hmingthang berte zinga mi India President pawh lo ni tawh thin, Dr Sarvepalli Radhakrishnan-a pianchampha hriatreng nan a Teacher's Day-a an hman thin kan hmang zo chiah a. India ram pawhin education a lo ngaihpawimawh zia a ti lang a ni. Pakistan rama education activist ropui leh Nobel Peace Prize pawh lo dawng tawh, Malala Yousefzai pawn education a pawimawh thu hi hahip in a lo puang chhuak tawh thin a. A au hla lar tak, “One Child, One Teacher, One Pen and One Book Can Change The World”, tih hi keini Mizote hian kan Zoram hmasawn nan he hla hi han au chhuahpui ve ta ila a va tha dawn tehreng em!


Mizoram hi literacy rate-ah kan sang a, India ram a state dang ngaihtuah pawhin a zahpuiawm lem loh a ni. Ziak leh chhiar thiam hnam chu kan ni meuh mai, amaherawhchu, ngun takin han in bih chiang lawk ta ila. Hnam dangin min thlir dan erawh chuan mi lehkhathiam hnam kan la ni lem lo a ni. Mi lehkhathiam hnam tih theih khawp a in hlangkai tur hian tan kan lak zual sauh sauh a hun ta. Sap tawng takin ‘mediocrity’ hi kan kalsan a hun e.


Mizote hi eng field-ah pawh awm i la, a tha ber emaw, a sang ber emaw, a har ber emaw tin zawn a tih hlawhtlin ngei hi kan tih makmawh a ni. Kan vai unaute hi example atan han hmang ta ila. Kum 2013 a IAS topper kha Gaurav Agarwal-a ani a. Ani hian India rama engineering entrance har ber IIT-JEE pal tlangin AIR 45 a ni a. Tichuan, IIT atangin Btech a zir zawh hnuah India rama Management entrance har ber a ngaih thin CAT pal tlangin IIM atangin Management tha takin a zo leh a, an batch-ah pawh ‘Gold Medalist’ a ni nghe nghe a ni. Multinational Company (MNC) lian tak Citigroup-ah Investment Banker hna tha tak kum rei vak lo a chelh hnuin mahni ram tan a thiamnate hmang duhin UPSC exam ngawrh takin a in puahchah leh ta a. Tichuan, UPSC CSE chu kum 2012-ah pal tlangin IPS-ah a tling ta a. Sardar Vallabhbhai Patel National Police Academy, Hyderabad-a IPS training hahthlak tak an neih mek laiin IAS ni turin a in puahchah tha leh ta a ni. UPSC CSE 2013-ah pakhatna (AIR 1) niin, IAS-ah chuan a tling ta va va a, ‘role model’ tha tak mi tam tak tan chuan a ni ngei ang. Tumruhna, taimakna leh chhelna lamah hian entawntlak tak pawh a ni awm e. Engineering leh Management lamah pawh India rama zirna in fraternity tha berah inziak tling turin a beih nasat a rinawm. IPS training lai a ‘attempt’ han pek that leh chu thil harsa tak a ni ngei dawn. Tin, sawrkar hnaah pawh a service sang ber chelh turin theih tawp a chhuah leh ngei bawk a ni. IAS-ah pakhatna han ni thei hial khawpin a han in vawrh chho leh thei a ni. Gaurav Agarwal-a angte khi role model-ah han nei ta ila, kan thalaite hian kan lehkha zirnaah theipatawp chhuahin, kan ti ve thei a ni tih hi a rinawm a ni.


Mitinin kan dam chhung hian thil tih tum leh nih tum kan nei theuhin a rinawm. Gaurav Agarwal-a anga India rama zirna in tha ber ber leh service tha berah, beih fe hnu pawhin kan la tling zo lo pawh a ni maithei, amaherawhchu, a pawimawh ber zawk chu kan thil tih engkimah taihmakna nen theih tawp kan chhuah em? tih hi a ni. Tin, a pawimawh leh chu kan society tana kan hriatna leh thiamna kan phak tawk ang zel a pek let leh kan ram hmasawnna atana thil engemaw tal kan thiamna hmanga kan tih ve hi kan bat a ni bawk a ni. IAS/IPS kan ni kher lo a ni maithei, IIT, IIM, AIIMS leh adt. atanga zir chhuak pawh kan ni kher lo maithei e. Gaurav Agarwal-a lamtluang zawh kher lo pawhin kan lehkha zir atanga kan hriatna leh thiamnate hmang tangkaiin kan ram tan thil dang tam tak kan ti thei a ni. Sawrkar hna kher lo tunlai tawngkam takin ‘Entrepreneurship’ lam hawi zawngte pawn hma nasa takin kan la thei awm e. Entirnan mahni company-te dinin kan Mizopuite tan eizawnna tha tak kan siam sak thei dawn a ni. Kan ram economy tan pawh hmasawnna ropui tak a lo ni ve thei ang. Engpawh nise, a laimu ber a chu kan zirnaah theihtawp kan chhuah hi a ni. Chuta tanga hriatna leh thiamna kan dawnte chu kan ram tan kan theih ang tawkin kan pe let ve thei dawn a ni.


Mizote hi kan vannei em em a. Sap Missionary hovin ziak leh chhiar min zirtir a. Chuta tang chuan lehkhate kan lo thiam chhova, thil tha leh tangkai kan zir hnem phah a, mizote pawh India hmarchhak tribal rau rauah chuan hmasawn chak berte zinga mi kan nih theih phah ta a ni. Andaman thliarkar zinga ‘North Sentinel Island’ an tih ah khuanin ‘Sentinelese Tribe’ an awm a. India ram hnam mawl berte – ‘Particularly Vulnerable Tribal Groups’ (PVTG) an tih zinga mi an ni. Khawvel pawn la dai meuh lo an ni a, anmahni rawn tlawh pawh tum hrim hrim chu thal nen an lo bei fo thin a ni. America Missionary pakhat, John Allen Chau-a, an hnena chanchin tha hrilh beisei a lo va kal pawh thalin an lo kap hlum a nih kha. Chu ti khawp a hnam mawl leh hnufual chu an ni. Sentinelese Tribe ho zingah hian pakhat tal pawn ‘education’ dawng thei ta se la chuan hma an va sawn chak dawn em! ‘Meena/Mina Tribe’ hi kan hre theuh tawh awm e. India rama tribal ho zingah rau rau chuan lehkha zirna lama hmasawn ber pawl an ni mai awm mange. Education an ngai pawimawh em em a. ‘All India Services’ (AIS) leh ‘Central Services’-ahte pawh Tribal ho zingah chuan a hnam anga lakin a tling tam ber an ni fo ta reng a ni.


“Education is the most powerful weapon which you can use to change the world” - Nelson Mandela

Pa ropui tak, South Africa rama midumte tan a zalenna lo sual chhuahpui tu leh an ram President pawh lo ni tawh thin, Nelson Mandela khan, “Education is the most powerful weapon which you can use to change the world”, a ti a. Khawvel siam danglam thei khawp a thil pawimawh a nih thu a lo sawi a ni. Kan Zoram hi kan hmangaih kan ti theuhin a rinawm, amaherawhchu, kan ram kan hmangaih tak tak a nih chuan ‘education’ hi kan ngaih pawimawh hmasak berte zinga mi a ni tur a ni. A chhan chu ‘education’ hian hriatna (knowledge), thiamna (skills), finna (wisdom) leh mize dik (character) a fun tel fo a, hei hian hmasawnna nasa tak mahniah, khawtlangah leh kan ramah a thlen thei dawn a ni.

176 views0 comments

Recent Posts

See All

We want things fast and we want them now. From Maggi 2 minutes noodles to half-day Amazon deliveries, corporations are banking on the very desire that drives our behaviour and the model seems to be wo