Thilsiamte Humhalh Zirlai 4-na: Tui: Kan Nunna Hnar- Dr. Lalani Kawlni

Tlang ram, ecosystem hrang hrang zinga derdep (fragile) ber pawl ah hian kan tui hna chu lui leh tuikhur (river systems), ruahtui leh lei chhunga tui (soil water) te hi an ni deuh ber a. Tlangram ecosystem hrisel pangngai ah chuan ruahtui kan dawng tha in, ruah chuan he’ng kan tuikhur, luite leh luipui te hi a chawm hneh viau tura ngaih a ni. Mawlmang taka sawi chuan tui hna tha nei tur chuan thil pahnih pawimawh em em mai an awm a, chu’ng te chu ramngaw humhalh leh lui dung (river system) tih bawlhhlawh loh te an ni.

Amaherawhchu, a “process” hi chutiang maia awlsam leh mawlmang ani hauh lo thung. Khuanu rel a thil tam tak tang khawm hian tui min pe ti ila a dik ber ang. Hydrological cycle- khawvel chhung leh van chung sanga tui leh tui hu in lumlet dan ah hian ramngaw te hi an pawimawh em em a ni. Anih leh ramngaw chuan engtin tak nge tui min pek? Thing chi hrang hrang a zirin tui an pai leh pek chhuah theih te, hnah in ruahtui alo hip leh pek chhuah theih te, a zung in tui a hip leh khawl dan te a inang lo a.

Chu mai ala ni lo, ramngaw chhuata thing hnah tla te chuan lei a ti hnawng a, chu’ng hnah chu a thing species a zirin, a len zawng te, tui a hip theih zat te, a khawl theih zat leh a pek chhuah theih zat te a la inanglo lehzel a ni. Chumi avang chuan ani, thing kan phun pawhin a ram leilung mil sa hi phun ang u kan tih thin ni.

Lui dung ngaw leh hnimhnah te hi tui hna humhalh nan a an pawimawh dan tur chu kan ngaihtuah thiam mai in a rinawm. Khawvel sik leh sa hi a danglam reng a, mihring te’n hmasawnna uma kan tlan nasat lutuk avangin a nih tur aiin a let tam takin a danglam chak a ni. Hei hian khawkheng te thlenin kan tui hna te a ti kang chat mek nasa em em bawk a ni.

Hemi belhchhah tur hian tawih theilo (non- biodegradable waste) te’n kan kawr, lui leh tuikhur te a hnawh khawro zo a. Plastic hi a tlawmin a zangkhai a, hman a nuam em lah taka. Amaherawhchu a tawih theih miau loh avangin tunah hian khawvel buaipui ber ani ta hial anih hi. Heng plastic chi hrang hrang zingah hian vawi khat hman- single use plastic kan tih hi a buaipui awm lehzual a ni. Han chhut chhin ta ila, Aizawl khawpuiah hian mi nuaih hnih singkua vel kan awm a, a population chanve chauh pawh hian nitin polythene pakhat hmang angin a tlem lamin chhut tai la kum khatah chuan polythen tawih theilo chuti zat chu leilungah kan hnutchhiah tihna a ni. Mimal leh inchhungkhura mihring zawng zawngin loh theihloha kan hman toothbrush te ang phei chu han ngaihtuah ta ila, kan hnutchhiah hnem tur zia hi!

Chuvangin, loh theihloh a hman ngai nilo, dispo thleng leh no te hi chu hman loh hram hram tum a ngai tak meuh meuh a ni. Chhungkaw chaweikhawm, khawtlang leh kohhran thil tihah kan uar ta viau leh nghala. He’ng te hian ani kan lui tui te hnawh bo zo ni. Mahni bazaar bag ken mai te, plate pangngai hman leh mahni tui thawl ken te hi kan tih luih hram hram a ngai a ni. Chuti anih loh chuan zir mite’n an chhut angin kum 2030 chho ah phei chuan khawvel hmun hrang hrang ah water crisis hi nasa takin a thleng dawn a, keini tlangram, ecosystem ah pawh a derdep ber pawl, khuarel chhiatna hrang hrang in a a hual vel reng leh ram a zawnga ram rethei, mahni inchawm zo lo te hian a lungkhawng kan tawrh zawh a rinawmloh a ni.

Mihring te hian hmasawn leh nawmsak kan duh vek a, nimahsela heng hmasawnna te avanga nawmsak rei (a sustainable) kan duh poh leh kan leilung hre reng leh hmangaih reng chungin, a hleiluaka hmasawnna nazawng um huam huam lovin chet kan lak a ngai a.Khita kan tarlan tak ang khian, nature a thilsiam hrang hrang te tang ho tang tangin kan tui hna tur te an siam ang hian, mimal in, chhungkaw tinin kan tih theih tawk kan tarlan ang te khi kan tih ve hram hram a tul tak zet zet a ni.

Tui mal far tete in tuifinriat a siam tih anih kha. Mimal tin hi kan pawimawh vek a, khuanu rorel ah hian thilsiam pawimawh tak kan ni tih kan thinlunga vawng rengin kan ram te reuh te, mawi tak hi I humhalh tlat ang u.

20 views1 comment

Recent Posts

See All

We want things fast and we want them now. From Maggi 2 minutes noodles to half-day Amazon deliveries, corporations are banking on the very desire that drives our behaviour and the model seems to be wo