Thilsiamte Humhalh Zirlai 3-na: Ramri Nei lo Ramsate Ramri Kham Saka Kan Humhalh Dan Hi!

Nungcha humhalh kan sawi ruala rilrua lo lang nghal chu "anmahni humhalh bikna hmun" (Protected Areas / PA) kan tih te hi an ni.

India ramah hian PA 800 chuang kan nei a, chung zinga 10 te chu Mizoram chhung ami an ni. Zariat chuang han tih chuan a tam hmel hle mai, amaherawhchu, India rama kan PA neih zawng zawngte hi India ram zau zawng aṭanga tehin 5.02% chauh an ni a, Mizoram chhunga PA kan neihte hi Mizoram zau zawng aṭanga tehin 5.88% chauh an ni bawk a ni.


Ramsa leh nungchate zalen taka an chettlatna tura kan humhalh (PA) bak zawng (95%) a awm ngaw te, ram te, phaitualhnim te, lui leh dil te hi nungcha tam zawk awmna an ni mêk si a, engtin nge ni ta ang le?


Mihringten an zalenna tur ramri kan kham sak a, kan phal zat chinah chauh hian awm turin nungchate hi kan beisei thei em, kan khuahkhirh tur leh kan thu thua kan dah theih an ni em le? Tum tehreng pawh ni ila thil theih loh hulhual a ni tih chu sikul leh Biak Ina kan inzirtirna aṭang pawhin kan hre ṭheuh ang.


Anih leh nungchate zalen taka an awm theihna “humhalh bik ram” neih chu a ṭha lo kan tihna em ni? Ni chuang lo ve! An ṭulin a ṭangkai em em a ni.


Changkanna, hmasawnna leh mihring inthlahpunna uchuak avangte in khawvel hi a danglam nasa em em a, kan damkhawchhuahna atan mihringten ram kan luah a, huan leh lo atan te, khawpui dinna'n leh khawl leh bungrua siamna hmunpui atan te ramngaw zau tak tak nasa takin kan suat mêk zel a ni. Hemi avang tak hian mihring chîm phal loh, ram humhalh bik, Protected Areas kan tih te hi siam an lo ṭul ta hial zawk a ni.


A bul lama kan ziah tak ang khian PA rin pawn, ram tam zawkah nungcha tam tak an awm mek bawk si, heng zawng zawng te hi Siamtu'n an khawsakzia leh nunphung a duandan tihlawhtlingtu pawimawh ber an ni lawi si.


Entirnan, Asia khawmualpuia Sakeibaknei kan neihchhun te hi Gujarat state a Gir hmunah an awm a, Gir PA chhung tluk zetin Gir bulhnai PA pawnahte chuan mihringin ramri kan siamsak pelin an inzarpharh mek tawh a ni. A dang lehah chuan Maharashtra state a PA ṭha ber berte tluk zetin PA pawn, mihring chengho huan leh lo ah te keite tam tak hmuh tur an awm ta bawk.


Heng bakah hian mihringin kan humhalh avang leh an chibik (species) humhalhna atan liau liaua PA siamsak an nih vang chauha chi la mang lo, sai leh sakei te pawh hian, an PA piah ram zau tak tak te an damkhawchhuah nan an mamawh leh zel bawk.


Han ngaihtuah ta ila, Keipui pakhatin no pahnih atanga pathum (a tam berah pasarih vel) a nei thei ta a. Heng a no te hi an puitlin hunah anmahni ram (territory) ṭheuh sual turin an vah darh a ṭul a, chung hmunah te chuan an damkhawchhuahna tur leh an nunphung leh nihzia tifamkim turin sa pela ei tur an mamawh bawk a. Population tha tawk tak chhawmzui tur chuan an thisenzawm hnai ni lo, population dang te nen an inthlahpawlh theih (connectivity neih) a ngai bawk a ni.


Entirnan, Tiger Reserve pakhat awm ta se, Reserve chu mihring awmna khua leh lo in thui tak hual kual vek si se, a chhunga cheng ramsate tan chuan tlat darh (disperse) ngaihna a awm lo a, an population ti hrisel turin anmahni zawm hnai ni lo population dang va pan kha an tan a harsat phah ta em em a ni. Heihi Habitat Fragmentation kan tih, Nungchate awmna hmun hrang hrang mihringin kan daidar, khawvel hmun hrang hrang a nungcha tam tak an mang vek nachhan a ni fo a ni.


Kan ramah pawh hian National Tiger Conservation Authority in kum 2019-a a thuchhuah ah chuan Mizoramah Sakei kan nei ta lo. A chhan tam tak awm thei te zinga langsar ta ber chu an sa pel tur mihringten kan pelh khalh a, ramngaw kan suat nasa em em bawk a, sa lian tam tak phei chu ram ri kham sak chawp a humhalh theih an nih loh avangin an lo rem zo ta a ni.


Ramsa leh nungchate hi an chanvo leh dikna kan hriatsak ve a, Siamtu'n duhtaka a siam anga an nunphung leh khawsakzia an chan chhuah theih ngei na tura anmahni nen khawsak ho kan zir thiam hi a ṭul takzet a ni.

- Dr. Lalani Kawlni

7 views0 comments

Recent Posts

See All

We want things fast and we want them now. From Maggi 2 minutes noodles to half-day Amazon deliveries, corporations are banking on the very desire that drives our behaviour and the model seems to be wo