Mizo te hi reservation nei chung si hian India ram a college tha zual ho ah hian duh ai hian kan tling thahnem tawk lo ni hian a lang a. Pathian zarah IIT leh IIM ah te kan lo zir chhuak ve thei a; tin, corporate lamah kum eng emaw zah kan lo thawk ve ta a. Ka tawn hriat atanga ka thil zir chhuah zirlai ten career planning atan an hlawkpui ngei tura ka rin te ka han tarlang hlawm ange.
Bul tan hma: Entrance exam leh thil dang tum kan neih hrim hrim hian duh aiin Mizote chu kan in buatsaih tlai thin. Entirnan, hnam dang chu IIT a luh tum chu pawl 10 an nih vel atang tawhin an tih tur kha an thlang fel tawh a, kum 2 chhung chu rilru phir pu lovin lehkha tha takin an zir thei thin a ni. Chutiang bawkin IIM a lut turin CAT exam te pawh undergraduate an nih lai atangin zawi zawiin an in buatsaih a, a tawp a bei vak vak lovin an tling mai thin ani. A tawp atan thil kan khek thin avang hian kan tui lohna leh kan tui na pawh kan hre hrang lova, kan pawngpaw beih ta chiam mai thin ani.
Kawng Kawh hmuh tu neih a pawimawh: A chunga kan tarlan tak a khi a chhan ni a lang chu a tam zawkah chuan thurawn pe tu leh kaihruaitu kan neih thin loh vang ani. Zah zum te, thil hriat loh vanga zah tlat te hi chin loh a tha a. Kan tuina leh tumna field a hlawhtling tawh kan Mizo pui emaw, hnam dang emaw kan hriat chu rawn bawrh bawrh mai tur ani. Thurawn tha min pe tu neih chu tha leh hun tam tak save na ani.
Fing taka awm tur:“Tum ruh tur” ,“Taimak tur” ti a in fuih te pawh hi a tha reng. Mahse a kawng hriat miau loh chuan lirthei a headlight awm lova chak deuh a khalh ang mai kan ni thin ani. Chuvang chuan internet te hmang thiam ila, mi kan rawn piah lamah hian mahni ngei hian research kan theih ang ang hian tih ve thin tur ani. Ka mi thenkhat tawn chu “chumi khami chu ka tum a” an tia, “internet ah i en tawh em?” Han ti ila, “en lem lo” ti a min chhang tawk hi an awm nual ani.
Zan khat thil thu ah thil a thleng thut ngai lo: Vawi leh khata taima an awm ngai lova, chutiang bawkin vawi leh khata thatchhia pawh an awm ngai lo. Phur thut vang maia hlawhtling an awm ngai lova, phur loh chang neih vanga hlawhtling ta lo tia sawi tur pawh hi ka hre em em lo. Hlawhting tur chuan hun leh tha tam tak sen a ngai tih hi kan hriat reng angai ani. Hemi anih avang hian school emaw college emaw kan kal lai atangin short-term goals in siam thin hi thil tih chi tak ani. Entirnan, “semester leh ah chuan tun semester ai chuan ka ti tha ang” tih te hi short-term goal tha tak ani. Mumal nei deuhin taimakna te, tumruhna te leh mahni inthunun te hi school leh college kal lai atang hian zir tur ani. College kal laia zir tha peih loh, discipline neilo kha coaching class tha berah pawh kal se a in thlak thut a rinawm loh ani.
Mahni inhriat: Mi kan in ang lova, kan thiamna leh talent neih te pawh a in chen lo. Kan taimakna leh thiamna in a tlin tawk hi hriat a tha khawp mai. Chumi hre tur chuan thil explore leh experiment peih angai a. Kan zirlai pawh zir tawk tawk peih kan nih chuan IAS te ang, zir nasat ngai lutuk chu kan ti chi lo maithei ani. Tha kan tih leh kan chak vanga tum ruh lutuk mai a zir vak ringawt te pawh kha thil tih chi ani lo ve thei ani.
In tih luih loh tur: Class XII kan zirlai khan hostel ah kan awm a. Room pakhat ah mi pali zel kha min dah a. Kan room a thiam thei ber kha a nu leh pa ten IAS ni turin a naupan lai atangin an ti a. Research lam ti chak tak kha chumi lam pawh focus thei lo chuan Civil Services exam tur khan kum tam tak a in buatsaih phah a. A tawp lamah phei chuan research kalsanin coaching full time a kal nghe nghe ani. Mahse chuti chung pawh chuan a tling thei lova, a tawpah chuan research ah bawk chuan a lut leh ta a. A roomate dang pathum te kha chu IIM Ahmedabad ah pahnih in MBA kan zir a, pakhat Harvard ah MBA a ti bawk a. A thiam thei ber kha kum tam tak tuina ni miah lova a hman ral avang chuan a nih tur ang pawh ani lawk thei lo ani. Mahni tuina emaw, tui lohna emaw a kan chian tawh chuan tih luih hram loh kha a fin thlak ber mai ani.
Mi bik nih a ngai lo: IIT te, IIM te leh Civil Services te pawh mi bik chauh tling thei tur hian thenkhat hian kan ngai thin a. Mi bik chu an awm teh meuh mai. Amaherawhchu a tam zawk hi mi bik an ni kher lo. Mi taima, mi invawng leh thuawih ni tur hian mi bik nih angai kher lo. Mi bik ai chuan mi taima, mi inbuatsaih peih mi, mi invawng leh mi thu awih thei te hi an hlawhtling duh zawk fo.
Comments